Молитва пророку Елисею

О, святый, славный пророче Божий Елисее! К тебе ныне прибегаем и смиренно просим, буди нам грешным ходатай у Престола Царя Славы. Вемы честное твое житие и славная деяния твоя, имиже, Господь, спасе верныя чада Своя. Милостию Илииною подадеся ти сугубая благодать и сотвори тя Господь светильник народу своему, да избавит его от тьмы нечестия и многобожия. Буди и нам утверждение в вере и благочестии, да явится в нас вера жива и действенна. Якоже некогда через тя воскреси Господь сына благочестивой жены, такожде и ныне чрез ходатайство твое да воскресит Господь души наша умерщвленные грехом. Да очистит и омыет нас, подобие омовению и очищению в водах Иорданских проказы Неемана сирианина. Сотвори тя Господь пророка неложна: зриши бо яко настоящая далече сущая: сего ради, прозрел еси семилетний глад в стране израильтестей и смерть Венадада царя сирийскаго. Умоли Всемилостиваго Бога да подаст нам видение неправд и согрешений наших. Да всадит в сердце наше дух смирения и кротости, дух братолюбия и незлобия, дух терпения, целомудрия и воздержания. Яко помазав пророче князя Ииуя на царство, испроси правителем нашим мудрость и нелицеприятие. Умоли Всещедраго Бога, отвратити от нас всякий гнев Его, праведно на ны движимый, и сохранити вся грады и веси, от глада, труса, потопа, огня, меча, и от нашествия иноплеменных и междоусобныя брани, от смертоносныя язвы, даровати же нам вся к жизни временней благопотребная и к вечному спасению полезная. Прослави тя, Господь, пророче и по кончине твоей, яко от прикосновения к честным останкам твоим воскреси мертваго, несомаго на погребение. Подобие и к нам да прикоснется благодать Божия, возставляющая от тли смерти всякое создание, и оживотворит ны к жизни праведной и благочестной. Наипаче же моли Господа, да сподобит всех нас по христианской кончине Небесное Царствие получити, идеже вси праведнии купно с тобою славят Отца и Сына и Святаго Духа во веки веков. Аминь.

Переглянуто: (14597)

Перейти к верхней панели